Een Wort vörwech to’n Verklaarn:

De Vörsitter vun’n Vereeen, de dat schreeben hett, wat op düsse Siet steiht, snackt un schrifft keen rein‘ Plattdütsch. Born un opwussen in Kiel, weer he in sien Kinnertied veele Johrn in‘n Sommer an de Westküst vun Schleswig-Holsteen un hett dor ook so mennich een Schnack opfungen un beholen. Dat, wat dor hütigen Dags op Platt vun em kümmt, hett sick över de Johrn in sien Bregen vermengeleert. Nu gifft‘ ja keen eenheetliche Rechtschrievung för dat Plattdütsche – dat is ja op letzt ook in’t Hochdütsche över Bord gahn – un dat mach aff un an bi’t Lesen ni ganz so kommodig togahn. Ick wünsch de Lesers liges `n beeten Pleseer, wenn se sick de Mööcht maken un den Text studeern.

Carsten R. Neumann, Vörsitter vun de Nordlichter-Ehrenlokföhrers un Isenbahnfrünn

Wat de Nordlichter-Ehrenlokföhrers un Isenbahnfrünn i. V. sünd,

wat se maken und wat se wüllt

Een Droom ward wohr - fahr doch sülvs mol een Damplok –

un dat vör een planmäßigen Personentoch in Dütschland:

An de Ostseeküst, in’n Harz oder in’t Erzgebirge –

dat geiht op 6 ünnerscheedliche Strecken! *)

Präsenteert ward dat Pleseer hier vun den indrogen Vereen

der Nordlichter-Ehrenlokföhrers un Isenbahnfrünn i. V. (N-ELF).

De Nordlichter-Ehrenlokföhrers un Isenbahnfrünn i.V. stellen sick för

- vun een passiven na een aktiven Fründ vun de Damplok -

Ick kun mi meist vörstellen, datt Se `n allgemein Interesse an de Isenbahn mitbringt, wenn Se dat hier lesen, man dat weer too scheun, wenn Se ook all besünners veel Spooß an de Damplok in sick drägen. Hebbt Se al mal davon dröömt, en Damplok mit Se ehr eegen Hann‘ na Fahlplan to foohrn?

Düssen Droom könt Se sick erfüllen!

Ut de Idee, Privatlüüd to Ehrenlokföhrers uttobilden, sünd op to richtige Konzepte wussen, un de mookt dat för jeden een – Deerns un Keerls – möglich, sick bit na de "allgemeine Befähigung zum Fahren einer Lokomotive" utbilden to laten.

As Ehrenlokföhrer steiht de Begeisterung för de Damplok ganz vörn an, un keen dat bi’t Mitfahrn op’n Föhrerstand all mol beleevt und gefulln hett, de hett all meist allens tohop, wat’n so brukt för een Lehrgang vun um un bi tein Dags op een Schmalsporbahn mit Dampbedriev. Ünner de wachen Oogen vun een Lehrlokföhrer ward de Utbillung dörchtrocken, un dorbi kunn Se meist vergeeten Berufsbiller kennenlehrn.

Vun’n Ostseestrand bit na dat Erzgebirge gifft dat Angebote vun de verscheeden Bahnünnernehmen, de een oder anner Utbillung rund um den Isenbahnbedriev antogahn. Na een beeten Inwiesen un Verkloorn um de Technik un de Seekerheet bi de Isenbahn geit dat rop op de Lok, un denn so warrn op’n Föhrerstand all de Hebels, Räder, Instrumente un wat dat sonst noch so gifft verkloort. Dorno geiht dat los mit dat Fahrn – toerst ward tookeeken, un denn geiht dat sülvs an’t Wark, `n beeten wat sinnich toerst, awers mit de Tied ook richtig na Fahrplan vör’n Toch un meesten Deels sogor de hele Streck. Tosamen mit den Lokföhrer un den Heizer geiht dat op Schicht, un de beiden Fachlüüd an Bord kieken de Schölers jümmers ganz genau op de Finger. An’t End gifft `n Examineern – man dorvör mutt keen enn bang wesen – un denn een Zertifikat vun de Bahngesellschop mit den Titel Ehrenlokföhrer.

Na – neejirich worrn?

De Nordlichter-Ehrenlokföhrers un Isenbohnfrünn i. V. sünd een Gemeenschop in de norddütschen Küstenlänners. Wi freiht uns ni blots över Ehrenlokföhrers, de to uns komt, man wi wüllt ook geern anner Lüüd kenn‘ leern un bi uns hebben, de wat mit de Isenbahn an’n Hoot hebbt. Een Lehrgang könnt Se liges ook maken, wenn Se ni bi uns Mitgleed warrn wüllt.

Man dat is ni blots das Geföhl vun de goode ole Tied, wat dor bi so’n Ehrenlokföhrer-Lehrgang opkamen un wat een so mit dat Ehrelokföhrer-Wesen verbinnen mach, so mennich een Droom ut de Jugendtied stickt dor ook achter. Un so blang bi künnt Se hütigen Dags noch veel mehr as blots een Blick in een lebennig Stück ut de Vergangenheet vun uns technische Kulturgeschicht beleven. De Technik, de de Welt vör bummelig twee Jahrhunderte so richtig in de Gang bröcht hett, verdeent een Barg Respekt, un dat Geföhl för de Naturkräfte Füer, Water, Köhlen un Luft ward op de Damplok wedder recht lebennig. Wat för uns Öllern oder Vöröllern op de Isenbahn elk een Dag för sick güng und wat een Damplokföhrer so allens to beschicken harr – wi könnt dat hüüt noch beleven un mitmaken – nich blots in’t Museum!

Wi snackt ook geern mol mit Se – ohn‘ dat Se dat glieks wat kussen deiht – ook op hochdütsch!

De Nordlichter-Ehrenlokföhrers un Isenbohnfrünn i. V. –

een jungen Vereen mit Geschicht‘

Ehrenlokföhrers – Deerns un Kerls – hebbt so bummelig tein Dags op’n Lehrgang bi een Bahngesellschop verbröcht, dat Examineern bestohn un sünd so berechtigt un ook klar, dat se ünner Opsicht vun een Berufslokföhrer een bestimmte Lok-Baureech sülvs fahren könt un sick mit de Streck, de Signale un de Vörschriften utkennt.

De Nordlichter-Ehrenlokföhrers un Isenbohnfrünn i. V. hebbt sick an’n 20. Oktober 2002 to een Vereen gründt. De Keimzelle geiht awers op den 3. April 1993 trüch, as de Mitgleeder vun den 1992 gründten Club DR Ehrenlokföhrers tohopen keem‘n, um so den Nordlichter-Stammdisch to bilden.

Wi setten uns dorför in, dat dat technische Kulturgut Damplokomotiv ni vergeeten ward, un wiel dat wi uns `n Barg vörnamen hebbt, um dat op de Reech to bringen, wüllt wi jeden een Isenbahnfründ gern bi uns hebben – ook wenn Se keen Plattdütsch snacken. As Vereen wüllt wi dor op af, use Beziehungen na de Ehrenlokföhrer-Utbillers un de ehr Personal just so to plegen as to anner Isenbahn-Bedrievers so dat wi dor use Ideen un Interessen inbringen könnt. Dorbi wüllt wi dorför sorgen, dat de Utbillung to’n Ehrenlokföhrer utbreed un noch bekannter ward.

De Begriff Ehrenlokföhrer is ni schützt, un af und an gift dat anner Vereens oder Inrichtungen, de sick mit een beeten Utbillung un een beeten Damplokfohrn gau mol wat dorto verdeenen wüllt. Dat schüllt de ook gern maken, man Ehrenlokföhrers komt bi een oder twee Stünn in de Nächte vun een Damplok un een poor Meter vör und trüch fohrn ni rut. Wi sünd just in de Gang, een Standard tosamen to klütern, un dat ward een lütte Norm, de de Ehrenlokföhrer-Utbillung een poor Mindestanforderungen mit op‘n Wech gifft.

In’n Harvs 2004 ward wi för den europäischen Club DR Ehrenlokführer de Johrsversammeln in Flensborg organiseern un utrichten un ook een Wochenprogramm dor rund um op de Been stellen. Wi warrn tomindst de groote Modellisenbahn in Hamborg, de groote Isenbahn-Kanalbrüch in Rendsborg, de Vossloh-Locomotives GmbH in Kiel, dat dänische Isenbahnmuseum in Odense un ook den VVM op sein Gelänn in Schönberger Strand besööken. Wi wüllt ook tosehn, dat wi een Sünner-Damptoch op de Angeln-Bahn tosamen kriegt. Ook dat Eider-Sparrwark, de Kanalschlüüs in Kiel-Holtenau, dat Isenbahn-Museum in Nümünster un dat Schipp "Cap San Diego" in’n Hamborger Hoben sünd op‘n Zettel. Keen dat bannich interesseert, kann us jo mol een Postkard schriven oder een Fax dörchjagen. För den een oder annern Gast ward‘ vörwiss noch’n Platz geven.

Böökers un annerwegens `n beeten wat to‘n Ankieken

Wenn Se bit to ni so recht klog ut den ganzen Schrivkrom worrn sünd und sick liges för de Nordlichter-Ehrenlokföhrers un Isenbohnfrünn i. V. interesseern, denn so hebbt wi wat, wat dor wohl wieder hölpen kunn – op hochdütsch.

Toerst is da us Vereensblatt, de Nordlichter-Depesche. De gifft dat all siet 1998, kümmt all twee Mon’de rut un hett so üm un to 40 bit 50 Siden, af un an ook mal `n beeten mehr. In düsse Zeitschrift steiht veel över de norddütschen Küstenlänner un de ehr Isenbahn, man ook ganz Dütschland un dat skandinavische Utland sünd jümmers mit dorbi – klor, dat dat dorbi meist um Dampflok geiht. Se könt sich gern mol een Proov bestellen oder ook glieks abonneern; dat kust över’t Johr 22,- Euro. Bi de Vereensmitgleeders is de Zeitschrift natürlich in’n Mitgleedsbedrach mit binn‘, un wenn Se as Abonnent Mitgleed in’n Vereen warrn wulln, denn so treckt us Schatzmeester glieks dat inbetalte Abo vun den Vereensbedrach wedder af.

Wat us’n Vereen wieder noch angeiht, gifft dat in’n Februar 2004 de erste N-ELF-Jahreschronik as VHS-Video mit de Nummer 3470 – ook för de Fernsehnormen vun anner‘ Länner. Un denn könt Se bi us ook een Vörbereitungsvideo bestellen, wenn Se sick erst mol to Huus op’n Bildschirm ankieken wüllt, wat dat mit so‘n Ehrenlokföhrer-Lehrgang op sick hett (Nr. 3171). Dat Wichtigste, wat för so’n Lehrgang tohopen kümmt un wat `n Ehrenlokföhrer för’t Examineern weeten mutt, ward in de 56 Minuten wiest, ohn‘ dat Se vörwech all wat vun de Dampisenbahn weeten mütt – allens ward sinnich Stück vör Stück verkloort.

Wat wi nich wüllt

Eegen‘ Fohrtüch wüllt wi nich hebben, un wi wüllt ook keen direkte Konkurrenz mit anner Isenbahnvereens in use Nächte – dat gifft ook wat, wat anner Lüüd beeter könt as wi, un dor wüllt wi ni an rütteln. Dorum sünd wi siet 2003 een "korporative Mitgliedschaft" mit den "Verein Verkehrsamateure und Museumsbahn e. V." (VVM) ingahn.
 
 

*) Dat weern mol söben Strecken, awers in’n August 2002 is de Anlag vun de Weißeritztalbahn (Freital-Hainsberg – Kipsdorf) bi dat dammige Hochwater twei gahn – un nu fehlt meist dat Geld, üm allens to repareern und wedder klor to kriegen.